O Concello do Corgo a través do Proxecto Corgoral, súmase á conmemoración desta efeméride  tan especial coa presentación pública  da Carta  Xeométrica de Galicia, elaborada hai case dous séculos polo prestixioso matemático e xeógrafo galego Domingo Fontán.

A carta xeométrica de Galicia, presentada oficialmente no ano 1834, foi o primeiro mapa de precisión, moderno e riguroso, que se fixo na Península Ibérica a partir de métodos  e criterios estrictamente  científicos. Para a súa elaboración foi fundamental contar  con unha base cartográfica na parroquia corguesa de Gomeán.

O resultado final dos desvelos de Domingo Fontán foi impreso en París no ano 1845, acadando unhas dimensións  colosais que axiña mereceron a recoñecida admiración púlbica da comunidade científica internacional. Así pois, a partir deste 25 de xullo fica instalada  para a posteridade e para goce de todas as persoas qu o queiran contemplar, unha reprodución fascimilar a escala real deste mapa na Biblioteca do Punto de Atención á Lectura do Corgo.

O Concello do Corgo, a través do Proxecto CORGORAL, presenta a súa programación cultural de verán para todos os veciños e visitantes, na que destaca como primeiro prato a proxección nocturna ao aire libre da película CUÑADOS. O acto terá lugar o vindeiro sábado 23 de Xullo, a partir das 22:30h, no incomparable e monumental Campo da Feira de Adai.

Este fermoso marco cultural municipal será o privilexiado palco no que se proxectará a exitosa comedia con denominación de orixe CUÑADOS, protagonizada, entre outros moitos, polos sobradamente coñecidos e moi populares actores Xosé Touriñán, Miguel de Lira e Federico Pérez Rei.
A asistencia a esta xornada de cinema ao aire libre é totalmente libre e gratuíta.

Non vos esquezades: estades convidados para xuntármonos todos os corgueses e pasarmos un agradable serán, recuperando esta boa oportunidade de convivencia entre moitos risos e complicidades.

Agardámosvos!

O Concello do Corgo, en colaboración co Arquivo Diocesano de Lugo e através do Proxecto CORGORAL, organiza o primeiro Curso de iniciación á lectura de documentos antigos. Co gallo da celebración internacional do Día Mundial dos Arquivos propoñemos unha achega práctica á lectura e comprensión dos documentos escritos como pouso de outras épocas.

O noso obxectivo é desempolvar eses vellos papeis dunha maneira sinxela: dando as claves para poder lelos e comprendelos. Sepárannos deles o contido (ás veces foros ou arrendamentos, ás veces partixas) e, moitas veces, o tipo de letra. Isto fai que nalgúns casos máis desafortunados, acaben no lixo por non se entenderen. Trátase de introducir aos interesados nese marabilloso mundo da escrita e aprender a valorar o que se agocha nas artesas e nos caixóns das nosas casas. 

Impartirase unha primeira achega teórica á paleografía e diplomática antiga, aprendendo a interpretar a linguaxe administrativa, a recoñecer os diferentes tipos de letra e as abraviaturas utilizadas con maior frecuencia. Posteriormente e a través de varios exemplos prácticos, explicarase ao alumnado o mellor xeito de descifrar as vellas escrituras. Podedes traer textos que vos resultan de difícil lectura ou interpretación, para descifrármolos entre todos. O curso é gratuíto, con un total de dez prazas dispoñibles, e terá lugar o xoves 9 de Xuño, de 17:00 a 20:00 horas na Biblioteca do Punto de Atención á Lectura do Corgo. Todas as persoas interesadas en inscribirse deberán enviar un correo electrónico antes do día 6 de Xuño, indicando o seu nome, apelidos e teléfono de contacto a proxecto.corgoral@gmail.com

O Concello do Corgo e o seu recentemente publicado Adiviñanceiro tradicional foron onte os protagonistas da presentación do número 64 da prestixiosa Revista Lvcensia, editada pola Biblioteca do Seminario Diocesano. No acto público, que congregou a unha numerosa asistencia na Aula Magna, o convidado de honra, nesta ocasión, foi o Proxecto CORGORAL, como exemplo de boas prácticas e implementación de metodoloxías participativas na recolla do Patrimonio Cultural Inmaterial.

Na presentación oficial do Adiviñanceiro tradicional do Corgo na bimilenaria cidade amurallada, o responsable do Proxecto CORGORAL explicou aos presentes todo o proceso de recollas, que contou coa axuda de numerosas persoas e institucións, entre os que sinalou ao cronista oficial, o Sr. D. Jesús Abuín Arias e ao alumnado e profesorado do CEIP Plurilingüe do Corgo e do CPI “Ramón Piñeiro”.

Tamén se deu a coñecer a recente inauguración da biblioteca do Punto de Atención á Lectura, a presentación de libros, concerto musical e recital poético desenvolvidos co gallo do Día das Letras e a edición en vindeiras datas do Refraneiro popular do Corgo, agora en fase de preparación.

ADIVIÑANCEIRO TRADICIONAL DO CORGO

O Concello do Corgo, en colaboración coa Diocese de Lugo e a través do Proxecto CORGORAL, promoveu o pasado 20 de Abril a primeira edición do Programa “Coñece o teu patrimonio” dirixido inicialmente ao público escolar. Con este programa preténdese que os alumnos do CEIP Plurilingüe do Corgo descubran, coñezan e valoren o importantísimo legado patrimonial que existe no concello. De entre todas as manifestacións artísticas que atesouran as nosas parroquias escollemos dúas que poden servir de exemplo para comprendermos mellor o patrimonio cultural material e inmaterial corgués: o belén da igrexa de San Martiño de Folgosa e as pinturas murais do templo románico de Santalla do Alto.

O belén articulado de Folgosa constitúe unha senlleira amostra da creatividade e da artesanía popular orientada á devoción conmemorativa do nacemento de Cristo. Trátase de unha maqueta a escala reducida que reproduce o ambiente da Terra Santa hai dous mil anos, con paisaxes poboadas por máis dun cento de figuras que representan á Sagrada Familia, aos Reis Magos e ao pobo de Belén nos seus máis diversos oficios e ocupacións tradicionais. Inclúe varios elementos dinámicos, animais terrestres, aéreos e acuáticos, así coma un río, muíños, fornos e un dispositivo audiovisual que reproduce o son de unha tormenta de raios. Todo isto precisamente no ano en que o Ministerio de Cultura iniciou os trámites para declarar o belenismo como manifestación representativa do patrimonio cultural inmaterial.

A igrexa de Santalla do Alto sobrancea pola súa excelente fábrica románica, con unha nave única, de planta rectangular e cuberta a dúas augas. A ábsida ten dous tramos: un deles recto, con bóveda de canón, e outro semicircular, con bóveda de forno. As pinturas murais polícromas destacan pola súa enorme beleza, estado de conservación e magnífica calidade artística. Entre as diversas escenas e temas representados pódense citar a Anunciación, o nacemento de Xesús, a Virxe como raíña dos anxos, os catro evanxelistas… Tamén resultan interesantes as imaxes escultóricas dos santos (Santa Bárbara, San Antonio…), a pía bautismal de granito con decoración xeométrica labrada e os cepillos petitorios dedicados ás ánimas do purgatorio, á Nosa Señora das Dores e a San Antonio de Padua… En fin, toda unha experiencia cultural inesquecible.

Agardamos que esta visita escolar do Programa COÑECE O TEU PATRIMONIO desenvolvido no ámbito do Proxecto CORGORAL sexa a primeira de unha serie na que todas as persoas interesadas poidan coñecer e apreciar a riqueza patrimonial e cultural que atesouran moitos dos fermosos recunchos que posúe o concello do Corgo.

O Concello do Corgo, a través do Proxecto CORGORAL, inaugurou o pasado sábado 23 de Abril a Biblioteca do Punto de Atención á Lectura. O acto tivo lugar na Antiga Escola e contou coa presenza de numeroso público, entre o cal se atopaban Jesús Abuín, cronista oficial do Corgo, e Benedicta Sánchez, coñecida actriz local honrada pola Xunta de Galicia coa medalla Castelao.

Para celebrar o Día Mundial do Libro, o concello corgués e a Asociación Cultural Arumes ofreceron un lote de libros a cada unha das persoas que asistiu, ao tempo que se celebrou un recital de poesía a cargo de Alberte Momán. O grupo de música tradicional A Legua Dereita, que este ano celebra o seu vixésimo aniversario, interpretou tres pezas do seu repertorio: a rumba de Darío, a muiñeira de Curuxeiras e a xota de Murias de Rao.

A posta en funcionamento da Biblioteca do Punto de Atención á Lectura do Corgo está a ser posible grazas ás xenerosas e desinteresadas doazóns de publicacións ofrecidas por diferentes particulares e institucións. Todas aquelas persoas que desexen coñecer os seus fondos bibliográficos, realizar consultas ou levar emprestado algún libro poderán facelo a través do servizo de cita previa, chamando ao concello ou enviando un correo electrónico a proxecto.corgoral@gmail.com

O Concello do Corgo, a través do Proxecto CORGORAL, celebra o vindeiro sábado 23 de Abril, Día Mundial do Libro, coa presentación pública da Biblioteca do Punto de Atención á Lectura. O acto terá lugar ás 20 horas nas Antigas Escolas de Agros e contará coa presenza das autoridades locais e dos representantes de diversas institucións culturais. Por outra banda, os membros da Asociación Cultural A Legua Dereita interpretarán varias pezas de música tradicional e serán distribuídos entre o público asistente vinte lotes de libros expresamente ofrecidos para este evento pola Asociación Cultural Arumes e polo concello.

A posta en funcionamento da Biblioteca do Punto de Atención á Lectura do Corgo está a ser posible grazas ás xenerosas e desinteresadas doazóns de publicacións ofrecidas por diferentes particulares e institucións, entre os que se atopan, a título de exemplo, a Asociación de Escritores en Lingua Galega, o Seminario Diocesano de Lugo, a Deputación Provincial de Lugo, a Fundación Barrié, o Instituto de Estudos Chairegos, o Museo Arqueolóxico e Histórico da Coruña, o Museo Arqueolóxico do Castro de Viladonga ou a Real Academia Galega de Belas Artes.

Estades tod@s convidad@s! Contamos coa vosa presenza!

O CENTRO DE ESTUDOS DO CORGO e a ASOCIACIÓN CULTURAL ARUMES, en colaboración co Concello do Corgo, presentan o vindeiro sábado día 9 de Abril, ás 20 horas no Centro Sociocultural do Corgo o número 8 da Revista CORGA. Neste volume danse a coñecer catro traballos: o primeiro, da autoría de Marco Antonio García-Gabilán Sangil, enceta as vicisitudes do deslinde municipal entre os concellos do Corgo e Láncara; a continuación, Lois Ladra trata do Proxecto CORGORAL e da prensa escolar como fonte para a recompilación da literatura popular de tradición oral; posteriormente, Óscar González Murado explica as capelanías e os capeláns do Corgo, para rematar con un estudo do románico no termo municipal corgués, a cargo de Mario Outeiro Iglesias.

O acto contará coa presenza de diversas autoridades locales, así como con representantes da Asociación Cultural Arumes e do Centro de Estudos do Corgo. Tamén estarán os autores, que farán un breve resumo das súas investigacións e dos traballos que se darán a coñecer.

• O Sábado día 26 no Pavillón Municipal do Corgo terá lugar a FESTA DE ENTROIDO , a partir das 16:30 horas e ata as 20:00 horas.
• Xogos, distintos inchables, música, baile, animación e moita festa!!
• Premios aos disfraces máis creativos e orixinais, con distintas categorías: de 3/6 anos, de 7/10 anos e de 11/14 anos. Inscricións no pavillón a partir das 16:30
• Coa actuación ás 18:00 horas da A.C. Legua Dereita do Corgo.
• Haberá  lambetadas e  chocolate con churros de balde para os disfrazados.